Familie Stauffacher

Esther und Melchior Stauffacher

S Mami und de Dädi Stauffacher füehret sitem 2009 mit voller Elan s Buurebeizli Dergeten. Am 1.1.2015 isch Tochter Miriam no dezue cho und etz wirds i derä Generationengemeinschaft gfüehrt. S Mami tuet choche, serviere, wirte, putze, etc. und managet s Beizli. De Dädi hilft nebscht em buure und de Landi au no tatkräftig im Beizli mit. Am liebste isch er aber scho bi sine Chüeh im Stall oder im Summer im Perfire z Alp.

2016, wo alli Chind "dusse" gsi sin, hens mitem Umbau vom Beizli agfange.  De ganz unter Stock wird für e (endlich) grösseri Chuchi und för nomol öpä 40 Sitzplätz usbaut. D Wohnig isch deför in obere Stock ue cho, und det isch alles sehr rustikal und gmüetlich iigrichtet.   

                                                                                                                                  Mam & Däd, ehr sin super!

Esther Schweizer-Stauffacher

S Eschterli und de Jörg mitem Guido, de Sophie, de Frida und em Albin  wohnet im Wiesli une und tüen det ihres Land ad GG Stauffacher verpachte. Bim heue und emdä cha au mengmol of ihri Hilf zählt werde, und sös werdemer secher "bewirtet" wemmer Durscht hen. 

S Esthi hilft a zwei Vormittäg i dä Dergete  und macht sit neustem au feini Geisse-Frischchäsli. De Jörg isch sit es paar Johr üse "Hus-Stromer" und mer chön ihm rüefe wenn öpis nöd tuet. 

Und wens nöd dähei im Wiesli sind, trifft mers i de "Schwizers-Weid" obe, wos sich schö igrichtet hen.

Dankä vielmol Esthi!

Miriam Stauffacher

D Miriam isch glernti Landwirtin und d Nochfolgerin vom Hof Dergeten. Sit em Januar 2015 isch sie i dä Generationengemeinschaft und het ihri Usbildig zur Agrotechnikerin HF im 2011 erfolgrich abgschlosse. Am liebste gseht mer sie ufäm Traktor oder bi ihrne gliebte Geissli. Mer trifft sie aber au viel im Beizli-Service a. Denn i üsere 3er Generationegmeinschaft het jede sin Kompetenzbereich, helfe tüen aber alli überall. 

Au privat isch d Miriam überglücklich. Sie wohnt zämä mit dä Petra und ihrem Hündli am Gino im Stei. Diä zwei gnüssets, wenns zämä Ziit bim buure oder serviere chön verbringe.

Dankä vielmol för diä guät Zämäarbet.

Marina Niederer-Stauffacher

D Marina isch diä wo no am wenigste i de Dergete isch. Das drum, will sie scho sit mengem Johr bi ihrem Maa, em Werner im Thurgau wohnt und buuret. Wenn sie aber id Dergete chunt, denn hilft sie natürlich au tatkräftig mit. Dank ihrer Büürinneschuel und abgschlossne Bruefsprüefig, cha me d Marina au überall isetze. 

Zämä hen d Marina und dä Werner zwei Meitli; d Natalia und d Xenia. Nebst Huusfrau und liebevoller Muetter, schaffet d Marina no als Medizinischi Praxisassistentin. Au hilft sie gern am Werner d Schöf pflegä, es sind nämli öber 300... Machet wiiter so ;-)

Dankä vielmol Marina!

Melchior Stauffacher

De Melch wohnt in Uetliburg. Er schaffet als Werkstattleiter bide Pizol-Bahnen und het viel Freud a dä Pistebullys. Wenns um Dergete-Maschine goht, chamer ihm immer rüefe. Au chunt er gern go helfä heue und emdä. Sin Traum wär mol e eigni chlini Werkstatt idä Dergete. Mer hens nöd vergessä und mol luegä, vilicht chömer do jo öpis mache ;-)

Au im Beizli hilft de Melch, wenn Not am Maa isch. Ob im Esse bringe oder Abwasch - de Melch isch überall ä Unterstützig för üs. 

Sit es paar Johre isch er bim Männerchor Laad und a dem heter viel Freud.

Dankä vielmol Melch!

Lydia Stauffacher

D Lydia wohnt   inere schönä Wohnig z'Ebnat unä. Sie schaffet etz 100% bi üs idä Dergete und im Winter goht sie no zum Sutter Sport go Skiservice etc. mache. Me cha sie bim choche, putze, serviere, umbaue und no bi vielem meh bruche - ä Allrounderin, wiäs im Bilderbuäch stoht. Mer sin sehr froh, dass Lydia bi üs agstellt isch.

Natürli goht sie immer no sehr gern go reise. Am liebste mit ihrem selber umbaute Camperbus. Au go Skifahre goht sie sehr gern, wenn sie do däför als zweifachi Gotte Zit findet.

Dankä vielmol Lydia!

Meta Schlumpf-Stauffacher

D Meta isch glernti Köchin und isch bi üs im Buurebeizli Dergeten agstellt. Zu de Meta ihrere Familie ghört ihre lieb Maa, de Rico und zämä hens zwei Söhn; dä Mauro und dä Renzo. Sie wohnet z Stei imene schöne Huus und gnüsset ihres jung Familielebe.

Wemer i de Dergete aber Hilf bruchet, sind beidi immer abrüefbereit. Dä Rico bim baue und meche und Meta im Beizli.

Nochem Muetterschaftsurlaub chönd mir wieder uf dä Meta ihri kreativ Kuchiarbet zelle. Zu ihrne Spezialitäte ghöret di selbergmachte Glacés - Mit oder ohni Geissmilch, ihre glingt jedi Sorte.

Dankä vielmol Meta!