Familie Stauffacher

Esther und Melchior Stauffacher

S Mami und de Dädi Stauffacher füehret sitem 2009 mit voller Elan s Buurebeizli Dergeten. Am 1.1.2015 isch Tochter Miriam no dezue cho und etz wirds i derä Generationengemeinschaft gfüehrt. S Mami tuet choche, serviere, wirte, putze, etc. und managet s Beizli. De Dädi hilft nebscht em buure und de Landi au no tatkräftig im Beizli mit. Am liebste isch er aber scho bi sine Chüeh im Stall oder im Summer im Perfire z Alp.

2016, wo alli Chind "dusse" gsi sin, hens mitem Umbau vom Beizli agfange.  De ganz unter Stock wird für e (endlich) grösseri Chuchi und för nomol öpä 40 Sitzplätz usbaut. D Wohnig isch deför in obere Stock ue cho, und det isch alles sehr rustikal und gmüetlich iigrichtet.  Im Johr 2023 hemmer denn no dä Stall                                                                                                                                               umbaut. Etz isches det au no e Stock ringer worde, will alli Tier idä Dergete ime neue Laufstall sin. 

                                                                                                                                  Mam & Däd, ehr sin super!

Esther Schweizer-Stauffacher

S Esthi und de Jörg mitem Guido, de Sophie, de Frida und em Albin  wohnet im Haglis imä neue Huus wos zämä im 2022 umbaut hen. Ihres Land im Wiesli wird ad GG Stauffacher verpachtet. S Esthi tuet inere Buurehof-Spielgruppe ushelfä und chunt au no jede Mittwoch Morge und Fritig Obet is Beizli go schaffe. Au d Chind packet scho ah idä Dergete. Sie helfet als Träger, sie bringet s Essä und tüän di leerä Teller abrume. 

 De Jörg isch sit es paar Johr üse "Hus-Stromer" und mer chön ihm rüefe wenn öpis nöd tuet. 

Und wens nöd dähei im Haglis sind, trifft mers i de "Schwizers-Weid" obe, wos sich schö igrichtet hen.

Dankä vielmol Esthi und Familie!

Miriam Stauffacher

D Miriam isch glernti Landwirtin und d Nochfolgerin vom Hof Dergeten. Sit em Januar 2015 isch sie i dä Generationengemeinschaft und het ihri Usbildig zur Agrotechnikerin HF im 2011 erfolgrich abgschlosse. Am liebste gseht mer sie ufäm Traktor oder bi ihrne gliebte Geissli und Chüäh. Mer trifft sie aber au viel im Beizli-Service a. Denn i üsere 3er Generationegmeinschaft het jede sin Kompetenzbereich, helfe tüen aber alli überall. 

Au privat isch d Miriam überglücklich. Sie wohnt zämä mit dä Petra und ihrem Hündli am Gino idä Vorderlaad, det hens chönä es Hüsli chaufe und selber umbaue. Mitem neue Stall isch d Miri überglücklich.

                                                                                                                                   Dankä vielmol för diä guät Zämäarbet.

Marina Niederer-Stauffacher

D Marina isch diä wo no am wenigste i de Dergete isch. Das drum, will sie scho sit mengem Johr bi ihrem Maa, em Werner im Thurgau wohnt und buuret. Wenn sie aber id Dergete chunt, denn hilft sie natürlich au tatkräftig mit. Dank ihrer Büürinneschuel und abgschlossne Bruefsprüefig, cha me d Marina au überall isetze. 

Zämä hen d Marina und dä Werner zwei Meitli; d Natalia und d Xenia. Nebst Huusfrau und liebevoller Muetter, schaffet d Marina no als Medizinischi Praxisassistentin. Au hilft sie gern am Werner d Schöf pflegä, es sind nämli öber 300... Machet wiiter so ;-)

Dankä vielmol Marina!

Melchior Stauffacher

De Melch und d Vanessa wohnet in Eschenbach. Det hens es wunderschös Wöhnigli nebetosse bimenä Buur. D

 Melch schaffet als Werkstattleiter bide Pizol-Bahnen und het viel Freud a dä Pistebullys. Wenns um Dergete-Maschine goht, chamer ihm immer rüefe. Au chunt er gern go helfä heue und emdä. D Vanessa isch imenä Altersheim als Service-Chefin agstellt. Diä zwei machets guät und sie gönnet sich au ab und zue mol es paar freii Täg. 

Au im Beizli hilft de Melch, wenn Not am Maa isch. Ob im Esse bringe oder Abwasch - de Melch isch überall ä Unterstützig för üs. 

Sit es paar Johre isch er bim Männerchor Laad und a dem heter viel Freud.

Dankä vielmol Melch!

Lydia Stauffacher

D Lydia wohnt zämä mit de Nathi  inere schönä Wohnig z'Ebnat unä. Sie schaffet  100% bi üs idä Dergete und dörf sich "Chef de Service" nennä.  Me cha sie bim choche, putze, serviere, umbaue und no bi vielem meh bruche - ä Allrounderin, wiäs im Bilderbuäch stoht. Mer sin sehr froh, dass Lydia bi üs agstellt isch.

Wenn sie nöd gad am schaffe sin, gön d Nathi und d Lydia mit dä Tschänny (ihrem Bus) uf Reise. Ihres Velo isch do däbi immer ständige Begleiter, und so machets teilwiis sehr langi Velotoure.

Mer sin froh, hemmer di bi üs im Restaurant!

Dankä vielmol Lydia!

Meta Schlumpf-Stauffacher

D Meta isch glernti Köchin und isch bi üs im Buurebeizli Dergeten agstellt. Zu de Meta ihrere Familie ghört ihre lieb Maa, de Rico und zämä hens zwei Söhn; dä Mauro und dä Renzo. Sie wohnet z Stei imene schöne Huus und gnüsset ihres jung Familielebe.

Will d Buebe schochli grösser sin, cha d Meta weder meh idä Dergete go schaffe cho. Ihri Ideeä rund um Essä und Deko sin sehr viel wert! Und im Summer gits amel feini selbergmachti Glace vodä Meta.

Am Rico chamer eifach immer öpis fröge wenns ums Thema Auto goht. Mä cha fascht sägä, er isch üse Huus-Automech ;-)

Dankä vielmol Meta!