Familie Stauffacher
Wir kochen und servieren für unsere Gäste.
Wir melken, füttern und pflegen unsere Tiere.
Und das mit Leidenschaft, Erfahrung und Tradition - Tag für Tag!
Esther Stauffacher
S Mami und de Dädi Stauffacher füehret sitem 2009 mit voller Elan s Buurebeizli Dergeten. Am 1.1.2015 isch Tochter Miriam no dezue cho und etz wirds i derä Generationengemeinschaft gfüehrt. S Mami tuet choche, serviere, wirte, putze, etc. und managet s Beizli.
De Dädi hät nebscht em buure und de Landi au immer tatkräftig im Beizli mitgholfe. Sit am 25. Oktober 2025 isch er leider nüma unter üs - mer vermissed di!
2016, wo alli Chind "dusse" gsi sin, hens mitem Umbau vom Beizli agfange. De ganz unter Stock wird für e (endlich) grösseri Chuchi und för nomol öpä 40 Sitzplätz usbaut. D Wohnig isch deför in obere Stock ue cho, und det isch alles sehr rustikal und gmüetlich iigrichtet. Im Johr 2023 hemmer denn no dä Stall umbaut. Etz isches det au no e Stock ringer worde, will alli Tier idä Dergete ime neue Laufstall sin.
Mam, mer packed da - Du bisch super!
Esther Schweizer-Stauffacher
S Esthi und de Jörg mitem Guido, de Sophie, de Frida und em Albin wohnet im Haglis imä neue Huus wos zämä im 2022 baut hen. Ihres Land im Wiesli wird ad GG Stauffacher verpachtet. S Esthi tuet inere Buurehof-Spielgruppe ushelfä und chunt au no jede Mittwoch Morge und Fritig Obet is Beizli go schaffe. Au d Chind packet scho ah idä Dergete. Sie helfet als Träger, sie bringet s Essä und tüän di leerä Teller abrume.
De Jörg isch sit es paar Johr üse "Hus-Stromer" und mer chön ihm rüefe wenn öpis nöd tuet.
Und wens nöd dähei im Haglis sind, trifft mers i de "Schwizers-Weid" obe, wos sich schö igrichtet hen.
Dankä vielmol Esthi und Familie!
Miriam Stauffacher
D Miriam isch glernti Landwirtin und d Nochfolgerin vom Hof Dergeten. Sit em Januar 2015 isch sie i dä Generationengemeinschaft und het ihri Usbildig zur Agrotechnikerin HF im 2011 erfolgrich abgschlosse. Am liebste gseht mer sie ufäm Traktor oder bi ihrne gliebte Tier. Mer trifft sie aber au viel im Beizli-Service a. Denn i üsere Generationegmeinschaft het jede sin Kompetenzbereich, helfe tüen aber alli überall.
Au privat isch d Miriam überglücklich. Sie wohnt zämä mit dä Petra und ihrem Hündli am Gino idä Vorderlaad, det hens chönä es Hüsli chaufe und selber umbaue. Mitem neue Stall isch d Miri überglücklich.
Dankä vielmol för diä guät Zämäarbet.
Marina Niederer-Stauffacher
D Marina wohnt scho sit menge Johr z Sitterdorf. Sie isch glernti medizinischi Praxisassistenin und schaffet, nebst Huusfrau und liebevoller Muetter vo de Natalia und Xenia, immer no 50% uf ihrem Bruef. Dank ihrer Büürinneschuel und abgschlossne Bruefsprüefig, cha me d Marina i de Dergete überall isetze. Au hät sie d Faszination "Biene" entdeckt und hät de Imkerkurs bsuecht - jez gits bald "Mari-Honig" ;-)
Mach wiiter so und mer freued üs immer, wenn du de Weg id Dergete findsch. Dankä vielmol Marina!
Melchior Stauffacher
De Melch und d Vanessa wohnet in Eschenbach. Det hens e wunderschöni Wohnig nebetosse bimenä Buur. Dä Melch schaffet als Werkstattleiter bide Pizol-Bahnen und het viel Freud a dä Pistebullys. Wenns um Dergete-Maschine goht, chamer ihm immer rüefe. Au chunt er gern go helfä heue und emdä. D Vanessa isch imenä Altersheim als Service-Chefin agstellt. Diä zwei machets guät und sie gönnet sich au ab und zue mol es paar freii Täg.
Au im Beizli hilft de Melch, wenn Not am Maa isch. Ob im Esse bringe oder Abwasch - de Melch isch überall ä Unterstützig för üs.
Sit es paar Johre isch er bim Männerchor Laad und a dem heter viel Freud.
Dankä vielmol Melch!
Lydia Stauffacher
D Lydia wohnt zämä mit de Nathi inere schönä Wohnig z'Ebnat unä. Sie schaffet 100% bi üs idä Dergete und dörf sich "Chef de Service" nennä. Me cha sie bim choche, putze, serviere, umbaue und no bi vielem meh bruche - ä Allrounderin, wiäs im Bilderbuäch stoht. Mer sin sehr froh, dass Lydia bi üs agstellt isch.
Wenn sie nöd gad am schaffe sin, gön d Nathi und d Lydia mit dä Tschänny (ihrem Bus) uf Reise. Ihres Velo isch do däbi immer ständige Begleiter, und so machets teilwiis sehr langi Velotoure.
Mer sin froh, hemmer di bi üs im Restaurant!
Dankä vielmol Lydia!
Meta Schlumpf-Stauffacher
D Meta isch glernti Köchin und isch bi üs im Buurebeizli Dergeten agstellt. Zu de Meta ihrere Familie ghört ihre Maa, de Rico und zämä hens zwei Söhn; dä Mauro und dä Renzo. Sie wohnet z Stei imene schöne Huus und gnüsset ihres jung Familielebe.
Will d Buebe schochli grösser sin, cha d Meta weder meh idä Dergete go schaffe cho. Ihri Ideeä rund um Essä und Deko sin sehr viel wert! Und im Summer gits amel feini selbergmachti Glace vodä Meta.
Am Rico chamer eifach immer öpis fröge wenns ums Thema Auto goht. Mä cha fascht sägä, er isch üse Huus-Automech ;-)
Dankä vielmol Meta!